Iyi mbumbanyigisho yibanda ku mateka y’ubusizi nyarwanda by’umwihariko, ndetse n’ay’ubuvanganzo nyarwanda muri rusange. Iyi mbumbanyigisho isobanura inshoza y’ubusizi, ikerekana ubwoko butandukanye bw’ubusizi n’ibisigo, ndetse ikerekana n’ubuhanga butandukanye bukoreshwa mu busizi n’uburyo ibihangano nyabusizi bishyirwa mu byiciro bitandukanye hagendewe ku buhanga buba bwakoreshejwe ndetse n’utundi turango dutandukanye. Iyi mbumbanyigisho kandi yigisha amahame n’amahange akoreshwa mu gusesengura ibihangano nyabusizi, kandi ikerekana iminozanganzo ikoreshwa mu busizi, ndetse n’uturango dutandukanya imvugo cyangwa inyandiko nyabusizi n’ibindi byiciro by’imvugo cyangwa inyandiko. Mu gusoza, iyi mbumbanyigisho icengera ubusizi nyarwanda igamije kwerekana uko bwagiye butera imbere mu iyogabihe, akamaro bwagiye bugira, ndetse n’ibibazo bwagiye buhura na byo kugeza ubu.